tulad ng cliffhanger, ang istorya ng bawat bilanggong pulitikal
ay hindi natatapos sa pagitan ng kinakalawang na selda,
ito ay hihimok sa lahat na mas mangahas makibaka
laban sa sistemang daig pa ang nabubulok na bangkay—ang estado.
makibaka, ‘wag matakot
laging paghihimutok
ng bawat hiningang sumusuntok
para gisingin ang mga inaantok;
itinaas ang panawagan ngunit baril ang tinutok
martsa sa lansangan at dampot ang inabot
hinaing ng masa ang tatahakin ngunit
posas sa kamay ang tunguhin
bakit sa bawat paglaban dahas at piit ang galawan?
lansangang tahanan ng libu-libong hustisya
unang sigwa, sa huli walang awa
sunud-sunod na paghiwa
para paduguin
durugin ang berdugong diktaturya
mahimbing mula sa manggagawa
alas tres ng madaling araw akala mo mga magnanakaw
alerto at ngangawngaw—
nandyan na sila
hahablutin ka nila
na 'kala mo nasa madilim kang iskinita…
kumakaripas
kisap-mata
humaharurot
walang preno-preno; red beater
takbo
tutok
dumapa ka!
ambilis
bilis
bilis
bilis ninyong magtanim
ng ebidensiya
pero ‘pag hustisya na ang sisingilin
ang
bagal
tumigil
ng oras
ngunit hindi rito natatapos
ang kwento nila
kwento mo
kwento natin
kwento ng isang
magsasaka, manggagawa, kababaihan,
sa may piniling kasarian
kung kaya't ang kwento nilang cliffhanger
sa pelikula ay
hindi natatapos sa pagkakulong
sa kinakalawang na selda
hindi natatapos
sa pagtigil
sa pagkilos
at paghimok
na mag-organisa
hindi natatapos sa radikal na tunguhin
ng pagpapahayag
hindi natatapos sa pagdakip
ang di pagtuloy ng rebolusyon
hindi natatapos at walang panapos
ang bawat huling salita ng kanilang kwento
dakpin.
busalan.
takpan.
tapakan.
harangan.
pigilan.
inagawan.
pinatay.
ito ay panimulang pambati lamang sa mga katanungang.....
ilang awit pa ba ang susulatin?
at mga panawagang uulit-ulitin?
ilang pagtatanghal pa ba ang tatanghalin?
ilang mukha pa ba ang guguhitin?
lamat na ilang beses uukitin?
kailan kaya susulitin?
ang kalayaang ipinaglalaban natin?
ang kwento nilang mala-pelikulang maneobra
at walang hanggang pagbibigay
ng pagkagiliw sa mangahas
na pakikibaka ang kwento nila
ang pagkulong ay ang pagdaluyong
ng mga panibagong militante
dugong salinglahi handang tumangan
at sumulong sa pahamak ang pagkauhaw
ng dugo, ng demonyong kaaway
ay tatapatan natin ng lubos na mapagpalayang militansiya
na dudurog sa kanilang hanay.
kung naghihimutok sa inis ng kaaway
sa pagpapakilos ng masang anakpawis,
hahayaan nating pumutok ang bawat ugat sa kanilang katawan sa sobrang galit
kung kasalanan man sa diyos ang lumaban
mas hihigitan natin ang init ng impyerno sa alab ng ating paglaban
Cliffhanger is a spoken word delivered by Donald Navayra of Kabataan Partylist Metro Manila to extend solidarity in the “Tuloy Lang, Laban Lang” benefit gig in celebration of Manila Today editor Lady Ann Salem’s birthday on March 3.
