Demolisyon sa Manggahan Floodway, maaaring matuloy sa Setyembre 26

0
305

Nakuha ng mga residente ng Manggahan Floodway sa Pasig ang kopya ng rekwes ng lokal na pamahalaan ng Pasig para sa paggiba ng mga tahanan ng mga residente sa East Bank.

Batay sa sulat noong Setyembre 11 ni Norman Luis De Leon, Acting Officer-In-Charge ng Pasig Action Line, nagrekwes sila sa Metro Manila Development Authority (MMDA) ng hindi bababa sa 500 katao para sa tatlong araw na maggigiba ng bahay para sa sapilitang demolisyon sa maralitang komunidad ng Manggahan Floodway. Unang tinarget ng lokal na pamahalaan ng Pasig ang demolisyon sa Setyembre 21.

Sa nakuhang kopya ng rekwes sa demolition team, sa Setyembre 26 na ang “operation date” o ang araw ng demolisyon.

 

Nagsagawa ng simbolikong protesta at barikada ng mga residente ng Manggahan Floodway na bahagi ng Balikwas Kadamay ang planong demolisyon ng Pasig noong Agosto 31. Bagamat tinatanggi ng mga pulis na nag-dispersa sa protesta noong araw na iyon ang tangkang demolisyon, ang pagkilos ng mga residente ay batay sa mga tarpaulin na pinaskil ng lokal na pamahalaan sa iba’t ibang bahagi ng Floodway na inaabisuhang maggiba ng sariling bahay (self-demolition) ang mga maralita sa loob ng Agosto 15 hanggang Setyembre 22 o ‘di kaya’y sapilitang maggigiba ang mga bahay sa Agosto 31.

Ang panawagan ng Balikwas Kadamay ay on-site development at pag-award ng lupa ng Floodway sa mga residente na nasa 40 taon nang naninirahan sa kahabaan ng Floodway.

Hinuli naman sa dispersal ng barikada ng mga residente ang 41 katao, kabilang na ang 10 menor de edad. Sinasabi rin ng pulis na nag-disperse at nanghuli sa mga tao na wala namang demolisyon. Nakalaya ang mga hinuli matapos ang siyam na araw batay sa pagsisikap ng mga residente at mga tagasuporta nila na makapagbayad ang piyansa.

Dalawang linggo ang nakakaraan, nagpakalat naman ng abiso ang lokal na pamahalaan ng Pasig ng pag-aalok ng financial assistance na nagkakahalagang P 20,000.

Alok na financial assistance ng lokal na pamahalaan ng Pasig.
Alok na financial assistance ng lokal na pamahalaan ng Pasig.

Pinaghandaan naman ng mga miyembro ng Balikwas Kadamay ang posibilidad ng demolisyon sa mga araw noong Setyembre 19 hanggang 22, ang katapusan ng notice para sa self-demolition.

Kung naaksyunan ng MMDA ang rekwes ng lokal na pamahalaan ng Pasig batay sa target nitong petsa ay sa Setyembre 21, 22 at 25 ang maaaring isagawang demolisyon.

Ang isa pang grupo ng mga residente sa East Bank Manggahan Floodway ay naninindigan para sa relokasyon sa 13 low-rise building na tinatayo sa East Bank. Mula 2012 pa itinatayo ang mga MRB, pero sa kasalukuyan ay iilang gusali pa lang ang naitatayo. Sinabi ng APOAMF sa paunawa nito, hindi dapat magkaroon ng baklasan ng bahay hangga’t hindi sila nakakalipat sa napiling relocation site.

LEAVE A REPLY

Please enter your comment!
Please enter your name here