Tumungo ang mga miyembro ng Balikwas Kadamay sa tanggapan ng Metro Manila Development Authority (MMDA) sa Makati upang siyasatin ang partisipasyon ng ahensya sa nakaambang demolisyon sa East Bank Manggahan Floodway sa Barangay Sta. Lucia, Pasig. Nakakuha ang grupo ng kopya ng sulat ng lokal na pamahalaan ng Pasig sa MMDA para sa rekwes na 500 tauhan para magsagawa ng demolisyon sa Floodway at tinugunan ito ng MMDA na isasagawa ang demolisyon sa Seytembre 26.
Sa isang dayalogo ngayon araw kasama si MMDA Deputy Chairman Francisco San Juan, sinabi nila na tiyak na gigibain bukas ang nasa 30 bahay ng mga indibidwal o pamilya na kumuha ng relokasyon o financial assistance sa Pasig.
Gayumpaman, kinumpirma din nila na tutugunan nila ang rekwes ng lokal na pamahalaan para sa 500 tauhan.
Para sa Balikwas Kadamay, labis-labis ang 500 tauhan kung 30 lang na kabahayan ang gigibain.
Kung magbabatay din sa sulat ng opisina ng Pasig Action Line, kasama sa mga gigibain ang mga bahay ng mga residenteng tumanggi sa alok na relokasyon at financial assistance. Sinasabi rin ng sulat ng Pasig Action Line na danger zone ang lugar at nakakasagabal ang mga tahanan sa flood control project sa lugar.
Ang inaalok na relokasyon ng lokal na pamahalaan sa Pasig ay sa Tanay, Rizal, pati ang Eusebio Bliss Village II sa Westbank Road na uupahan o huhulugan ng mga malilipat doon. Ang isa pang relokasyon, ang medium-rise building (MRB) ng National Housing Authority (NHA) sa East Bank Road ay hindi pa tapos mula nang masimulan itong itayo noong 2012.
Ayaw naman ng mga residente sa malayong relokasyon na kadalasa’y wala ring hanapbuhay. Tinututulan din nila ang substandard na paggawa ng mga pabahay, gayundin ang pagnenegosyo ng gobyerno sa pabahay para sa mahihirap.
Naninindigan ang Balikwas Kadamay sa on-site development at pag-aaward ulit ng lupa sa mga residente. Paghahandaan naman ng grupo na depensahan ang kanilang mga tahanan laban sa demolisyon.
Sa sulat naman ng Presidential Commission for the Urban Poor (PCUP) sa MMDA ngayong araw, sinasabi nito na hindi maaaring matuloy ang demolisyon bukas sapagkat may mga hindi pa naaaksyunang aplikasyon para sa relokasyon ng ilang apektadong residente sa NHA. Ayon sa sulat, sa isang Memorandum of Agreement (MOA) sa pagitan ng PCUP, MMDA, NHA at lokal na pamahalaan ng Pasig ay dapat na mabigyan ng Certificate of Unit Allocation ang mga kwalipikadong benepisyaryo sa relokasyon sa MRB ng NHA bago maumpisahan ang demolisyon. Maaari umanong humarap sa mga ligal na aksyon ang lalabag sa MOA.
