Mga kaso ng COVID-19 sa NCR ngayong Abril 17

Sa kinulumpon na ulat ng mga local government unit (LGU) sa National Capital Region (NCR), umabot na sa 3,526 ang kumpirmadong kaso sa rehiyon, kung saan 427 ang gumaling habang 379 ang namatay.

Inulat naman ng Department of Health (DOH)  ngayong araw ay may 5,878 kumpirmadong kaso ng COVID-19 sa bansa, 487 ang gumaling habang 387 ang pumanaw.

Tumampok ang ilang usapin sa mga ulat ng mga LGU sa NCR:

• Ang unang kaso ng namatay sa Pateros ay naiulat ngayong araw.
• Nabawasan ng isa ang naitalang namatay sa Marikina nang mapag-alaman ng LGU na ang isang naitalang kaso ay residente ng Rizal.
• Dalawang syudad lang ang nagtatala at nag-uulat ng mga namatay nitong PUI o mga kasong probable o suspect: ang Navotas (29 probable, 6 kumpirmado) at ang Mandaluyong (29 suspect, 24 kumpirmado).
• Ang Malabon at Makati na lang ang patuloy na nagtatala at nag-uulat ng bilang ng contact o iyong dating PUM.

Hindi pa lahat ng LGU ay nakalipat na sa bagong klasipikasyon ng mga indibidwal na inilabas ng DOH kamakailan – mula PUI at PUM, tungong confirmed, probable at suspect. Hindi isinama ng DOH sa klasipikasyon ang contact, na bahagi ng klasipikasyong inilabas ng World Health Organization, kung kaya’t hindi na naitatala at naiuulat ang mga dating ibinibilang sa PUM.

 

Talaan ng mga kaso ng COVID-19 sa NCR mula sa mga ulat ng mga LGU (Abril 17)

 

 

Maynila

Ayon sa Manila Health Department, 412 ang kumpirmado, 459 ang maituturing na ‘probable’ habang 111 naman ang ‘suspect’ na mayroong COVID-19 sa lungsod. Samantala, 56 na ang nag-rekober habang 47 naman ang binawian ng buhay.

 

Quezon City

Ang naitalang kumpirmado sa COVID-19 sa syudad ay umabot na sa 1,016 habang 154 ang suspect, 83 gumaling sa sakit at 90 ang namatay.

 

Caloocan

Sa huling ulat ng Caloocan LGU noong Abril 15, mayroong 88 kumpirmadong kaso ng COVID-19, 77 PUI, 143 PUM, 16 gumaling at 21 namatay sa syudad ng Caloocan.

 

Valenzuela

Ang dalawang bagong nagpositibo sa syudad ay dadalhin sa Balai Banyuhay, ang quarantine facility ng LGU.

 

Navotas

Sa Navotas, mayroon nang 19 kumpirmadong kaso, 64 ang probable pero 29 dito ay namatay na, 60 ang suspect na naka-home quarantine at 6 na namatay.

Ang mga tinuturing na suspect ng syudad ng Navotas ang mga PUI (mild, severe, critical) na wala pang test o hindi pa-natetest na (1) may mga sintomas ng trangkaso, (2) naglakbay o nanirahan sa mga lugar na may positibong kaso ng COVID-19 sa loob ng 14 araw bago magka-sintomas, (3) nagkaroon ng close contact sa isang PROBABLE o CONFIRMED kaso ng COVID-19 sa loob ng 14 araw bago magka-sintomas, (4) nagkaroon ng biglaang karamdaman sa baga sa hindi malamang kadahilanan at kinakailangang maospital and (5) may lagnat, ubo o hirap sa paghinga at senior citizen, buntis, health worker o may iba pang sakit.

 

Malabon

Mayroong 29 kumpirmadong kaso, 101 suspect, 3 probable, 4 na gumaling at 6 na namatay sa lungsod ng Malabon.

 

San Juan

Mayroong 175 kumpirmadong kaso, 320 suspect, walang probable, 36 na gumaling at 31 na namatay sa lungsod ng San Juan.

 

Marikina

 Noong Abril 17, mayroon nang 79 kumpirmadong kaso, 1 ang probable, 22 ang suspect, 11 ang gumaling at 17 ang namatay.

 Mula sa ulat nito noong Abril 16, nabawasan ng isang case ang “death” at isang case sa “confirmed/positive” na galing sa Barangay Concepcion Dos ngayong araw dahil naberipika na kasong iyon na namatay ay residente ng lalawigan ng Rizal, habang ang naitalang isang confirmed case ay sa lalawigan ng Rizal umuwi matapos na siya ay gumaling, paliwanag ng Marikina Public Information Office (PIO).

Ipinaliwanag ng Marikina PIO kung bakit magkaiba ang datos ng DOH NCOV tracker sa updates ng LGU.

“Ang data sa DOH Covid-19 tracker ay raw data na kailangan pang i-validate/verify ng CHO-CESU. Marami sa pasyente ng Covid-19 ang gumamit ng address ng Marikina o ang ospital na pinagdalhan ay nasa Marikina ngunit ang pasyente ay sa ibang bayan o lungsod nakatira. Sa validation/verification process lumalabas ang wastong address/tirahan ng pasyente,” ayon sa Marikina PIO.

 

Mandaluyong

Nitong Abril 17, ang naitalang kumpirmadong kaso ng COVID-19 sa Mandaluyong ay umabot na sa 262, walang probable, 571 suspect, 31 ang gumaling at 24 ang namatay. Itinatala rin ng LGU ng lungsod ng mga PUI o suspect deaths na umabot na sa 29, mas marami ng 5 kaysa sa mga namatay na kumpirmadong positibo sa COVID-19.

Pinakamaraming kumiprmadong kaso ng COVID-19 sa Highway Hills, Mauway at Addition Hills.

 

 

Pasig

Sa huling ulat ng Pasig LGU noong Abril 14, mayroong 205 confirmed, 21 probable, 239 suspected, 45 na naka-rekober at 37 na nasawi sa COVID-19.

Sa mga barangay ng San Jose at San Nicolas na lang walang naitalang kumpirmadong kaso ng COVID-19. Pinakamaraming kaso sa barangay Ugong na may 27 habang may tig-17 sa Manggahan, Pinagbuhatan at Rosario na mga kasunod na may pinakamaraming kaso ng COVID-19.

 

Makati

 Nagtala noong Abril 15 ng 319 kumpirmadong kaso ng COVID-19 ang DOH sa syudad ng Makati, kung saan 204 ang nakumpirma at nasa ilalim na nang pangangalaga ng Makati Health Department.

Ginagamit pa rin ng Makati LGU ang lumang klasipikasyon ng mga indibidwal, kung saan ang naitala nila ay 506 persons under investigation (PUI), 395 persons under monitoring (PUM), 31 ang gumaling at 23 ang nasawi mula sa naturang sakit.

 

Taguig

Mayroong 180 confirmed, 113 suspect, 22 gumaling at 13 namatay sa lungsod.

 

Pateros

 Sa munisipalidad ng Pateros, mayroon nang 16 kumpirmadong kaso, 3 ang gumaling at isa ang namatay. Ang unang kaso ng namatay ay naitala ngayong araw, dahil ngayong araw lang napaabot ng DOH ang resulta ng test ng namatay. Nasa 18 naman ang naitalang suspect na kaso at walang probable na kaso.

Nagtatala pa rin ng PUI at PUM ang munisipalidad, kung saan mayroong 90 na PUI at 100 na PUM.

 

Pasay

Sa ulat ng Pasay LGU noong Abril 17, mayroong 109 confirmed, 21 probable, 35 suspect, 18 na naka-rekober at 11 na nasawi sa COVID-19.

 

Parañaque

Sa huling ulat ng Parañaque LGU noong Abril 16, mayroon nang 347 confirmed na kaso ng COVID-19 sa lungsod, 414 probable at. 206 suspect. Umabot na sa 36 ang gumaling at 23 ang namatay.

 

Las Piñas  

Sa ulat ng Las Piñas LGU noong Abril 17, mayroong 97 confirmed, 5 probable, 41 suspect, 13 na naka-rekober at 7 ang nasawi sa COVID-19.

 

Muntinlupa

Sa Muntinlupa, mayroong 115 kumpirmadong kaso, 102 probable, 102 suspect, 14 ang gumaling sa sakit at 17 ang nasawi.

Pinakamaraming nagpositibo sa COVID-19 ang naitala sa Barangay Ayala Alabang na may 30 kumpirmado.